اطباق من الكاليماري

اطباق من الكاليماري

الكاليماري المحشي :

1ك \ كاليماري مقفول يعني زي القرطاس مش مفتوح

ومغسول بالمية و الدقيق و الملح و منقوع دقيقة في

مية و خل و بعدين نسيبه يصفي المية

---- الحشوة الاولي :

-- حشو محشي عادي

يعني نقول مثلا :

1\2 كوب رز

1 بصلة متوسطة

1 طماطم كبيرة

1\4 كوب بقدونس و شبت و كزبرة خضرا و نعناع اخضر

( او ناشف ) مفرومين

ملح - فلفل - كمون

نقطع البصلة مكعبات و نشوحها في السمن او الزيت

لغاية ما تصفر

نضيف عليها الطماطم و الفلفل و الملح و الكمون

و نسيبهم يتسبكوا

نضيف الرز و نقلب لغاية المية ما تتبخر

ننزله و نضيف الخضرة و نسيبه لما يبرد

نبتدي الحشو لغاية 3\4 الكاليماري بس او اقل كمان

علشان الرز ما يطلعش اثناء السوي

نقفلها بالخيط او بسلاكة الاسنان

و الاسهل نلفها في ورق فويل

-- نغلي مية و نحطهم حوالي من 1\3 الي 1\2 ساعة

و بعدين نطلعهم و نصفيهم من المية ونحمرهم



---- الحشوة الثانية


--جمبري صغير

توم

ملح - فلفل - كمون

كزبرة خضرا و بقدونس اخضر مفرومين

فلفل اخضر مكعبات

الطريقة :


-- نشوح التوم في السمنة او الزيت

نضع عليهم الجمبري لغاية ما تتبخر المية و نقلب عليهم

الفلفل الاخضر و الخضرة

و نقلب مرتين تلاتة

و بعدين نبتدي الحشو

وما نملاش اوي الكاليماري

ممكن نحطها في المية المغلية

او في الفرن في صينيه و حواليها

شوية مية وبصلة شرائح و فلفل و ملح

او نحمرها

وانا شخصيا افضل التحمير


-- طاجن الكاليماري :

نقطع الكاليماري مكعبات او نصفين حسبما تفضل

-- 1 بصلة متوسطة

-- 5 فصوص توم

-- 1 فلفل اخضر كبير

-- 1 حبة طماطم متوسطة او كبيرة علي حسب الكمية

-- كزبرة خضرا و بقدونس و كرفس مفرومين

-- عصير ليمونة كبيرة

-- ملعقة خل

-- ملح - فلفل - كمون -زنجبيل -جوزة الطيب - كاري - شطة

--( ممكن نضع معاهم جمبري صغير يبقي روعة )

-- 2 ملعقة زيت


الطريقة :

نشوح البصل اولا ثم الثوم ونضع عليهم الفلفل الاخضر

ونشوحهم

ثم الطماطم الي ان تتسبك

ثم الكاليماري و الجمبري اذا وجد

ثم التوابل و الخضرة ونقلب

وبعد ذلك شوية مية صغيرين خالص

و نغطي بالفويل و ندخل الفرن حوالي 1\4 ساعة

وممكن طبعا في اي صينية عادية

و بالهنا و الشف